ថ្មីៗនេះ លោក Elon Musk ស្ថាបនិក ក្រុមហ៊ុនផលិតរថយន្ដអគ្គិសនីល្បី Tesla បានចែករំលែក សារមួយលើគណនីបណ្ដាញសង្គម Twitter របស់លោកថា រថយន្ដអគ្គិសនី Pick up ម៉ូដែលថ្មីរបស់ Tesla ឈ្មោះថា Cybertruck មិនត្រឹមតែខ្លាំងលើដីប៉ុណ្ណោះទេ តែមានសមត្ថភាពអាចបើកលើទឹកបានដូចកាណូតដូច្នោះដែរ ។ 

យោងតាមសារនោះ លោកបានសរសេរ​ថា ៖ 

“Cybertruck គឺមានលក្ខណៈមិនជ្រាបទឹក​គ្រប់គ្រាន់ សម្រាប់ការប្រើប្រាស់ជាទូក ក្នុងរយៈពេលខ្លី ដែលវាអាចឆ្លងកាត់ ទន្លេ បឹង និងសូម្បីតែ សមុទ្រ ដែលមានផ្ទៃទឹករៀងស្ងប់ផងដែរ។

លោកបានបន្ថែមបញ្ជាក់ទៀតថា វាអាចមានសមត្ថភាពធ្វើដំណើរកាត់ទឹកបានពី Starbase ឬស្ថានីយ៍ SpaceX របស់លោក ទៅកាន់តំបន់ South padre Island ក្នុងរដ្ឋ Texas ដែលគិតជាចម្ងាយ ប្រមាណ ៣៦០ ម៉ែត្រ បើតាមការប៉ាន់ស្មានពី Electrek ។ 

គួររំឭកថា Cybertruck គឺជាប្រភេទរថយន្ដអគ្គិសនី pickup រូបរាងជ្រុងៗរបស់ Tesla ដែលត្រូវបាន Elon Musk នាំយកមកបង្ហាញមុខជាសាធារណៈលើកដំបូងកាលពីឆ្នាំ ២០១៩ នឹងត្រូវបានពន្យារពេលចេញលក់ជាច្រើនសារ ដោយសារបញ្ហា កង្វះគ្រឿងបង្គុំ និងតម្រូវការកែប្រែប្រព័ន្ធបំពាក់ក្នុងឡានមួយចំនួន តែបើតាមការឆ្លើយតបពីក្រុមហ៊ុន បានឲ្យដឹងថា អាចនឹងសម្រេចចេញនៅរង្វង់ត្រីមាសទី ១ នៃឆ្នាំ ២០២៣ នេះ។ 

យ៉ាងណាមិញ សមត្ថភាពពិតប្រាកដរបស់វាយ៉ាងណានោះ គឹមិនទាន់អាចសន្និដ្ឋានបាននៅឡើយទេ មានតែចាំមើលរហូតដល់ថ្ងៃដែល រថយន្ដអគ្គិសនីនេះ ចេញជាផ្លូវការសិន ព្រោះថារថយន្ដប្រភេទពហុមុខងារបែបនេះ គឺត្រូវការការត្រួតពិនិត្យត្រឹមត្រូវលើ លក្ខណៈបច្ចេកទេស និងប្រព័ន្ធសុវត្ថិភាព ការពារការឆ្លងចរន្ដផ្សេងៗជាដើម។ 

អត្ថបទ៖ Andra